ഐ‌ഒ‌എസിന് ആന്‍ഡ്രോയ്ഡിനേക്കാള്‍ പതിന്മടങ്ങ് സുരക്ഷയുണ്ടെന്ന് ഇടക്കിടെ അവകാശപ്പെടാറുള്ള ആപ്പിളിനെ ഞെട്ടിച്ചിരിക്കുകയാണ് ചൈനയിലെ ഹാക്കര്‍മാര്‍.ഐഒഎസ് 15.0.2 സോഫ്റ്റ്‌വെയറില്‍ പ്രവര്‍ത്തിക്കുന്ന ഏറ്റവും പുതിയ ഐഫോണ്‍ 13 പ്രോ സെക്കന്‍റുകള്‍ കൊണ്ടാണ് ഹാക്ക് ചെയ്ത് കാണിച്ചുകൊടുത്തത്.
ചൈനയിലെ ചെംഗ്ഡുവില്‍ നടക്കുന്ന അന്താരാഷ്ട്ര ഹാക്കിംഗ് മത്സരമായ ടിയാന്‍ഫു കപ്പില്‍ പങ്കെടുത്ത ഹാക്കര്‍മാര്‍ അതീവ സുരക്ഷിതമെന്ന് അവകാശപ്പെടുന്ന ഐ.ഒ.എസിനെ പൂപറിക്കുന്ന ലാഘവത്തോടെയാണ് കീഴ്പ്പെടുത്തിയത്. വര്‍ഷാവര്‍ഷം സംഘടിപ്പിക്കുന്ന ടിയാന്‍ഫു കപ്പില്‍ ഹാക്കര്‍മാര്‍ക്ക് അവരുടെ ഹാക്കിങ് കഴിവുകള്‍ പ്രദര്‍ശിപ്പിക്കാനുള്ള അവസരമാണ് ലഭിക്കുന്നത്. ആപ്പിള്‍, ഗൂഗിള്‍, മൈക്രോസോഫ്റ്റ് തുടങ്ങിയ വന്‍കിട ടെക് കമ്ബനികളുടെ സുരക്ഷാ വീഴ്ച്ചകള്‍ കണ്ടെത്തി, അവ ഭേദിച്ച്‌ ലക്ഷങ്ങള്‍ സമ്മാനമായി നേടുകയാണ് ഹാക്കര്‍മാര്‍.
പരിപാടിയില്‍ പങ്കെടുത്ത കുന്‍ലൂണ്‍ ലാബ് ടീമാണ് 15 സെക്കന്‍റുകള്‍ മാത്രമെടുത്ത് തത്സമം ഐഫോണ്‍ 13 പ്രോ ഹാക്ക് ചെയ്തത്. ഫോബ്സ് പുറത്തുവിട്ട റിപ്പോര്‍ട്ട് അനുസരിച്ച്‌, ഐഫോണ്‍ 13 പ്രോ ഹാക്ക് ചെയ്യാനായി സഫാരി ബ്രൗസറിലെ ഒരു സുരക്ഷാ വീഴ്ച്ചയാണ് ടീം ഉപയോഗപ്പെടുത്തിയത്.
അതേസമയം, ആപ്പിള്‍ ഉപകരണങ്ങളെ ജയില്‍‌ബ്രേക്ക്‌ ചെയ്യുന്നതില്‍ പ്രശസ്തരായ ടീം പാംഗുവാണ് (Pangu) വിദൂര ജയില്‍‌ബ്രേക്കിംഗിലൂടെ ഐഒഎസ് 15-ല്‍ പ്രവര്‍ത്തിക്കുന്ന ഐഫോണ്‍ 13 ഹാക്ക് ചെയ്ത് 300,000 ഡോളര്‍ സമ്മാനമായി നേടിയത്. കുന്‍ലൂണ്‍ ലാബിന് ഹാക്ക് ചെയ്യാന്‍ 15 സെക്കന്‍റുകള്‍ വേണ്ടിവന്നെങ്കില്‍, ടീം പാംഗുവിന് വെറും ഒരു സെക്കന്‍റ് മാത്രം മതിയായിരുന്നു.
ഐഫോണ്‍ 13 പ്രോയില്‍ നിന്ന് ഫോട്ടോകള്‍, ആപ്പുകള്‍ എന്നിവ ആക്‌സസ് ചെയ്യാനും ഡാറ്റ ഇല്ലാതാക്കാനും ഹാക്കര്‍മാര്‍ക്ക് കഴിഞ്ഞത്രേ. പുതിയ ഐഫോണിലെ സുരക്ഷാ തലങ്ങളെ മറികടക്കാന്‍ "iOS15 കേര്‍ണലിലെയും A15 ചിപ്പിലെയും ഒന്നിലധികം വീഴ്ച്ചകള്‍" ഉപയോഗപ്പെടുത്താന്‍ ഹാക്കര്‍മാര്‍ക്ക് കഴിഞ്ഞതായും ഫോര്‍ബ്സ് റിപ്പോര്‍ട്ടില്‍ പറയുന്നു.
0 Comments